Lajmet e fundit

Kryeparlamentari Krasniqi priti drejtorin e Agjensionit Antikorrupsion, z. Preteni

E Hënë, 03.03.2008




Kryetari i Kuvendit të Republikës së Kosovës, Jakup Krasniqi, kishte sot një takim me drejtorin e Agjensionit Antikorrupsion, z.Hasan Preteni. Agjensioni Antikorrupsion i përgjigjet dhe i raporton Kuvendit të Kosovës për punën e tij. Në këtë frymë ky Agjension tashmë i ka dorëzuar administratës së Kuvendit dhe kryeparlamentarit Raportin e Punës për vitin 2007.

Në prononcimin para medieve lidhur me këtë takim , kryeparlamentari Jakup Krasniqi theksoi se ka shprehur gatishmërinë e tij dhe të Parlamentit që të mbështesë politikisht dhe financiarisht këtë Agjension, në mënyrë që ai të këtë mundësi të kryejë punët dhe përgjegjësitë e tij , sipas ligjit mbi anikorrupsionin dhe ligjet tjera që kanë të bëjnë më këtë dukuri. Duke qenë se Agjensioni Antikorrupsion i përgjigjet Parlamentit, tha në vijim kryeparlamentari Krasniqi, do të bëjë gjithçka që është e mundur për të luftuar këtë dukuri negative të shoqërisë në tranzicion, që korrupsioni të mos bëhet plagë e pashërueshme për të penguar zhvillimin e ekonomik , por edhe segmentet tjera të jetës e të punës së qytetarëve.

Lidhshmëria ndërmjet Kuvendit të Kosovës dhe Agjensionit Antikorrupsion është obligative, theksoi në prononcimin e tij Hasan Preteni, drejtor i këtij Agjensioni, ndaj edhe për këtë sot dorëzova Raportin e këtij Agjensioni për vitin 2007.Njëkohësisht shpreha gatishmërinë që për segmente të këtij Raporti dhe për çështje tjera që janë me interes për Kuvendin të raportojë në çdo kohë. Në vazhdim , Hasan Preteni, njoftoi se ky Agjension sivjet ka siguruar buxhetin e kërkuar në mbështetje të ligjit, gjë që nuk e kishte dy vjet më parë. Mungesa e buxhetit të nevojshëm na krijonte mjaft probleme, që reflektoheshin negativisht në angazhimin tonë, duke krijuar edhe mangësi, sidomos kur ishte fjala për sigurimin e zyrtarëve. Në këtë vështrim sigurimi i buxhetit për këtë vit është një fillim shumë i mbarë dhe presim që kjo praktikë të vazhdojë edhe më tutje. Përkitazi me atë se cilat subjekte janë të përfshira më shumë me veprime korruptive , Hasan Preteni tha se qysh më 12 shkurt kemi bërë publike disa pjesë të Raportit, që është paraqitur sot në Kuvend. Nga informatat që kemi 4 institucione janë më të përfshira me korrupsion: gjykatat, ndërmarrjet publike, Qeveria dhe pushteti lokal.
Kryeparlamentari Krasniqi priti drejtorin e Agjensionit Antikorrupsion, z. Preteni