Lajmet e fundit

Kryeparlamentari Krasniqi mbajti një ligjëratë para studentëve të Universitetit AAB të Prishtinës

E Enjte, 10.04.2008




Kryetari i Kuvendit të Kosovës, Jakup Krasniqi, mbajti sot një ligjëratë para studentëve të Universitetit AAB në Prishtinë. Temë qendrore e ligjëratës ishte Kosova pas statusit. Në fillim kryeparlamentari Krasniqi para studentëve dha një historik të shkurtër të proceseve të bisedimeve shqiptaro- serbe për zgjidhjen e statusit të Kosovës. Këtyre bisedimeve , theksoi Jakup Krasniqi iu priu lëvizja paqësore në Kosovë që nga fillimi i viteve 90, por një rol vendimtar për të tërhequr vëmendjen e bashkësisë ndërkombëtare për atë që po ngjante në Kosovë dhe vullnetin e shqiptarëve për liri e sovranitet dha lufta e UÇK-së. Në vijim kryeparlamentari paraqiti të dhëna interesante rreth Konferencës së Rambujesë, fryt i së cilës ishte edhe intervenimi i forcave të NATO-së kundër caqeve luftarake serbe, të cilat pas Marrëveshjes së Kumanovës dhe Rezolutës 1244 të KS të OKB-së sollën një realitet të ri në Kosovë. Meqë, bisedimet e Vjenës nuk dhanë ndonjë rezultat, si dhe përpjekjet që statusi të zgjidhet në KS të OKB-së, alternativë e vetme mbeti shpallja e pavarësisë së Kosovës, në bashkëveprim me faktorin ndërkombëtar, duke u mbështetur në Pakon e Ahtisarit. Në këtë aspekt shtrohet edhe pyetja se athua ka mundur të shpallet pavarësia edhe më parë, gjithsesi se ka pasur mundësi, por gjithnjë kishim parasysh bashkëpunimin me bashkësinë ndërkombëtare dhe faktin që pas shpalljes së pavarësisë do të vijë çështja e njohjes ndërkombëtare, me të cilën janë ballafaquar shumë shtete . Tash po shihet se kjo ishte e drejtë, duke ditur dinamikën e kënaqshme të njohjes së Kosovës sovrane nga ana e shteteve të ndryshme të botës, që do të mundësojë integrim më të shpejtë në organizmat ndërkombëtarë, sidomos në aleancën veriatlantike, OKB, UE, OSBE, por edhe në fondacionet ndërkombëtare monetare.

Pas shpalljes së pavarësisë dhe miratimit të Kushtetutës së Kosovës, që përbëjnë dy data historike për Kosovën, tehu i Legjislaturës së Tretë do të përqendrohet në kultivimin e vlerave në lëmin e politikës dhe demokratizimit të jetës së gjithëmbarshme shoqërore e ekonomike në pajtim me kulturën e demokracive më të zhvilluara në botë. Punë e madhe këtë legjislaturë e pret edhe në lëmin e realizimit të detyrave që dalin nga Plani i mijëvjeçarit, sipas të cilit duhet të zhduket varfëria e skajshme, analfabetizmi, si dhe duhet të forcohet roli i gruas në shoqëri.

Parlamenti në të ardhmen duhet të përqendrohet posaçërisht në funksionalizimin e shtetit , përkatësisht të sundimit të ligjit, thellimin e reformave në sistemin gjyqësor dhe në lëmenjtë tjerë, mirëpo këto ndryshime nuk mund të bëhen pa njerëz të shkolluar dhe të përkushtuar . Në këtë frymë brezave të rinj iu duhet një vizion shtetndërtues, për të ngritur kapacitete për zhvillim sa më të hovshëm të Kosovës.

Ligjërata u ndoq me interesim të veçantë nga ana e studentëve, ndërsa pas saj, kryeparlamentari Krasniqi bashkë me udhëheqjen e këtij Universiteti vizitoi edhe ambientet ku zhvillojnë studimet studentët e këtushëm.
Kryeparlamentari Krasniqi mbajti një ligjëratë para studentëve të Universitetit AAB të Prishtinës
 

Komisioni për Buxhet dhe Financa

Tel: 038 211 186

Email: asd@sadfsdf.com

Komisioni për Buxhet dhe Financa

Tel: 038 211 186

Email: asd@sadfsdf.com