Lajmet e fundit

Kryetari i Kuvendit të Republikës së Kosovës, Jakup Krasniqi, i shoqëruar nga anëtari i Kryesisë, Xhavit Haliti, ka pritur sot një delegacion të Partisë Republikane të Shqipërisë, të kryesua nga Fatmir Mediu, kryetar i partisë dhe ish-ministër i Mbrojtjes, në përbërje të të cilit kishte deputetë të Kuvendit të Republikës së Shqipërisë nga Grupi Parlamentar PR-së dhe anëtar të Kryesisë së kësaj partie.

Është biseduar për zhvillimet në të dy vendet, për bashkëpunimin e ndërsjellë dhe për integrimet brendakombëtare.

Kryeparlamentari Krasniqi ka folur për realitetin e ri të krijuar në Kosovë pas shpalljes së pavarësisë së vendit dhe për gjithë zinxhirin e elementeve të shtetformimit të Kosovës.

Kryetari i Partisë Republikane të Shqipërisë, Fatmir Mediu, ka shprehur kënaqësinë që ndodhet për vizitë në shtetin e pavarur të Kosovës, duke i uruar Krasniqit për aktin sublim të shpalljes së pavarësisë nga Kuvendi i Kosovës dhe njohjen ndërkombëtare që ka pasuar për shtetin e ri të Kosovës.

Z. Krasniqi i ka shprehur delegacionit të Partisë Republikane ngushëllimet më të thella për viktimat e tragjedisë së Gërdecit, duke e vlerësuar akti moral të z. Mediu lidhur me këtë ngjarje të dhimbshme.

Në vazhdim biseda është përqendruar në hapësirat e gjera për bashkëpunim në shumë lëmenj të jetës ndërmjet Kosovës dhe Shqipërisë, siç është bashkëpunimi ekonomik, kulturor dhe institucional etj, e sidomos bashkëpunimi në planin e energjetikës dhe turizmit.

Bashkëbiseduesit janë pajtuar se përfundimi me kohë i rrugës që lidh Durrësin me Prishtinën e më larg, do t’i kontribuojë bashkëpunimit të suksesshëm ndërmjet të dy vendeve dhe integrimeve gjithëpërfshirëse brendakombëtare.