Lajmet e fundit

Nga vazhdimi i mbledhjes plenare të Kuvendit

E Enjte, 05.04.2012




Kuvendi i Republikës së Kosovës, në mbledhjen e sotme plenare, të kryesuar nga dr. Jakup Krasniqi, kryetar, (një pjesë të seancës e udhëhoqi nënkryetari Xhavit Haliti), ka diskutuar për rastin e arrestimit të dy policëve të Kosovës nga ana e xhandarmërisë serbe në kufi me Serbinë, si dhe ka miratuar në parim dy projektligje.

Fillimisht, Kuvendi është përfshirë në diskutime për rendin e ditës, pas kërkesës së kryetarëve të dy komisioneve parlamentare, Zenun Pajaziti e Nait Hasani, për futje në rend dite të Projektligjit për ndryshimin dhe plotësimin e Ligjit për ndërmarrjet publike dhe atij për ndryshimin dhe plotësimin e Ligjit për ndërtimet. Deputetët e opozitës kërkuan tërheqjen nga rendi i ditës të Projektligjit për bankat, institucionet mikrofinaciare dhe institucionet financiare jobankare, dhe mos futjen në rend dite të dy projektligjeve të propozuara. Pas dy ndërprerjeve të seancës dhe konsultimeve ndërmjet kryetarit të Kuvendit dhe kryetarëve të grupeve parlamentare, si dhe nënkryetarëve të Kuvendit, Projektligji për bankat, institucionet mikrofinaciare dhe institucionet financiare jobankare u hoq nga rendi i ditës, ndërsa Projektligji për ndryshimin dhe plotësimin e Ligjit për ndërmarrjet publike dhe ai për ndryshimin dhe plotësimin e Ligjit për ndërtimet, pas votimit për shmangie nga Rregullorja e Punës së Kuvendit, u futën në rend dite. Grupi parlamentar i Vetëvendosjes, ndërkaq, duke insistuar që këto dy projektligje të mos futen në rend dite, lëshoi sallën.

Kuvendi procedoi me shqyrtimin e këtyre dy projektligjeve, të cilat u prezantuan nga zëvendëskryeministrja Edita Tahiri dhe ministri i Zhvillimit Ekonomik, Besim Beqaj. Pas diskutimeve, Kuvendi përkrahu në parim ato dhe ngarkoi komisionet përkatëse për shqyrtim të mëtutjeshëm.

Në vazhdim të seancës, ministri i Punëve të Brendshme, Bajram Rexhepi, e informoi hollësisht Kuvendin me ngjarjen e 31 marsit në kufi me Serbinë. Ai dha detaje për mënyrën e kidnapimit të policëve të Kosovës nga ana e xhandarmërisë serbe, të cilët, siç tha Rexhepi, kanë qenë duke patrulluar me veturë brenda territorit të Republikës së Kosovës, te pika 4, afër lagjes Matarova në fshatin Dumnicë të Podujevës.

"Gjatë kryerjes së detyrës zyrtare të patrullimit të rregullt përgjatë brezit kufitar në mes të Republikës së Kosovës dhe Serbisë, afro 120 metra në brendi të territorit të Kosovës, nga prita e përgatitur, policët janë kidnapuar nga ana e një grupi prej 12-13 pjesëtarësh të xhandarmërisë së Serbisë", theksoi ministri Rexhepi, duke shtuar se policët e Kosovës nuk e kanë kaluar zonën e përgjegjësisë së tyre, gjë që, sipas tij, është konstatuar edhe nga ekspertizat e mëvonshme.

Rexhepi tha se ky veprim tinëzar dhe i organizuar i xhandarmërisë serbe, ka dëshmuar edhe njëherë orientimin dhe mentalitetin agresor të shtetit serb ndaj Republikës së Kosovës. Ai u zotua se Policia e Kosovës do të vazhdojë punën e saj në kontrollin e kufirit me Serbinë, në mbrojtje të rendit e të ligjit, sipas obligimeve kushtetuese.

Edhe kryetari i Komisionit për Punë të Brendshme, Siguri dhe Mbikëqyrjen e FSK-së, Ahmet Isufi, kidnapimin e pjesëtarëve të Policisë së Kosovës e cilësoi agresion ndaj territorit dhe institucioneve të Kosovës, goditje të rendit dhe ligjit në Kosovë. Isufi tha se këtij arrestimi i ka paraprirë edhe deklarata ministrit të brendshëm serb, e cila, sipas tij, do të duhej të merresh më seriozisht.

"Nuk janë në pyetje këtu individët, ata që janë gjetur në atë moment, por është në pyetje uniforma e shtetit të Kosovës, simbolika e shtetit, integriteti territorial dhe jeta e qytetarëve të Kosovës", theksoi Isufi, duke e cilësuar veprimin e Serbisë si antidemokratik, antievropian dhe antinjerëzor. Ai adresoi kritika ndaj qeverisë për mos përgatitje serioze të menaxhimit të situatave të kësaj natyre.

Në emër të Grupit Parlamentar të PDK-së, deputeti Fatmir Xhelili theksoi se përgjegjësinë për vijën kufitare me Serbinë e ka KFOR-i, përderisa kompetencat barten shumë ngadalë dhe në mënyrë të planifikuar. Ai tha se policia kufitare e Kosovës ende nuk i ka kapacitetet e plota për ta menaxhuar atë pjesë të vijës kufitare dhe kërkoi përshpejtimin e zhvillimit të saj. Sipas tij, syçeltësia dhe kujdesi i zyrtarëve policorë të Kosovës është dashur të jetë më në nivel, por, duke marrë parasysh rrethanat dhe relacionet me Serbinë dhe sigurinë rajonale, ai arsyetoi maturinë e menaxhimit të situatës nga ana e Qeverisë së Kosovës.

Në emër të Grupit Parlamentar të LDK-së, deputeti Anton Quni theksoi se ndërhyrja e forcave policore-ushtarake të Republikës së Serbisë në brendi të territorit të Republikës së Kosovës, në terminologjinë politike-ushtarake, njihet si agresion, ndërsa arrestimi dhe kidnapimi i zyrtarëve të Policisë së Kosovës në kryerje të detyrës brenda territorit të vendit, në fjalorin e drejtësisë njihet si akt kriminal. Sipas tij, kalimi i të njëjtave forca nga bazat e tyre nëpërmes zonës tokësore të sigurisë, është thyerje e marrëveshjes ushtarake dhe teknike ndërmjet KFOR-it dhe forcave jugosllave dhe atyre serbe. Ai kërkoi angazhim më të sofistikuar dhe profesional në kontrollin e kufirit nga forcat vendore.

Deputeti Blerim Shala nga Grupi Parlamentar i AAK-së, u shpreh se ngjarja e 31 marsit tregon që Serbia e sotme është vazhdimësi e asaj të djeshmes, që e tashmja e Beogradit zyrtar nuk dallon prej të kaluarës dhe që me këtë politikë të Serbisë ndaj Kosovës, e ardhmja e raporteve midis dy shteteve është larg asaj që paralajmërohet me ngulm. Shala kërkoi ndërmarrjen e veprimeve, në mënyrë që të zbardhet e vërteta për ngjarjen e 31 marsit, që ngjarje të tilla të mos përsëriten më, si dhe të përgatitet dosja e të gjitha shkeljeve të Rezolutës 1244 dhe marrëveshjes së Kumanovës nga ana e Serbisë.

Deputetja Myzejene Selmani nga Koalicioni për Kosovën e Re, duke dënuar kidnapimin e dy policëve të Kosovës, kërkoi nga institucionet përkatëse që të punohet më tepër për forcimin e sundimit të rendit dhe ligjit në tërë territorin e Kosovës. Nga faktori ndërkombëtar ndërkaq, kërkoi marrjen e masave të rrepta ndaj shtetit serb, i cili mundohet të ndërhyjë në sovranitetin dhe territorin e Republikës së Kosovës. Ajo kërkoi, gjithashtu, që ky rast të dërgohet edhe në OKB.

Në vazhdim, deputetët shpalosën qëndrimet e tyre për ngjarjen, e cila, njëzëri u cilësia agresion ndaj Republikës së Kosovës nga ana e Serbisë, por, gjithashtu, u kërkuan masa nga institucionet vendore, në mënyrë që akte të tilla të mos përsëriten në të ardhmen.

Nënkryetari i Kuvendit, Xhavit Haliti, theksoi se mentaliteti ballkanik, duke e parë secili-secilin si armik, duhet të fillojë ndryshojë. Ai tha se nuk duhet të tregohet patriotizëm me incidente të tilla, e as të sulmohen bartësit e institucioneve përkatëse apo pjesëtarët e policisë. Nënkryetari Haliti theksoi se nuk është mirë që nga Kuvendi i Kosovës të bëhen përpjekje për ngritje të tensioneve. "Ta miratojmë ligjin për kufirin, të insistojmë që sa më shpejtë në bisedimet më Serbinë të bëhet edhe demarkacioni i kufirit Kosovë - Serbi dhe këto probleme të zgjidhen gradualisht", theksoi Haliti.

Pas shterjes së debati, kryetari Krasniqi konsideroi se nga ky debat duhet të obligohet Këshilli i Sigurisë së Kosovës, me të gjithë mekanizmat e tjerë të tij, që të marrë të gjitha masat e domosdoshme për mbrojtjen e sovranitetit të shtetit, të jetës e të dinjitetit të qytetarëve të tij.

Kuvendi procedoi me shqyrtimin e projektligjeve, por në mungesë të kuorumit ndërpreu punimet. Mbledhja vazhdon nesër në orën 11:00.

Nga vazhdimi i mbledhjes plenare të KuvenditNga vazhdimi i mbledhjes plenare të KuvenditNga vazhdimi i mbledhjes plenare të KuvenditNga vazhdimi i mbledhjes plenare të Kuvendit
 

Komisioni për Buxhet dhe Financa

Tel: 038 211 186

Email: asd@sadfsdf.com

Komisioni për Buxhet dhe Financa

Tel: 038 211 186

Email: asd@sadfsdf.com