Lajmet e fundit

Mbledhja plenare e Kuvendit

E Enjte, 19.04.2012




Mbledhja e sotme e Kuvendit të Republikës së Kosovës, e kryesuar nga kryetari i Kuvendit, dr. Jakup Krasniqi, (një pjesë u kryesua nga nënkryetari Xhavit Haliti) filloi me pikat e rëndomta të rendit të ditës, përkatësisht kohës për deklarime jashtë rendit të ditës dhe pyetjeve parlamentare, për të cilat çështje u përgjigjën këta ministra: Ramë Buja, Dardan Gashi, Nenad Rashiq, Fehmi Mujota dhe Bedri Hamza.
Kryeministri i Kosovës, Hashim Thaçi, në përfundim të pikës për deklarime jashtë rendit të ditës, njoftoi deputetët për zhvillimet e fundit në vend, me theks të veçantë në veri të Mitrovicës. Me këtë rast ai tha se i kupton shqetësimet e të gjithë qytetarëve për situatën e tensionuar në këtë pjesë, por shtoi se nuk mund t'i kuptoi dhe t'i arsyetojë deklaratat dhe thirrjet e disa deputetëve për përdorim të forcës në veri. "Nuk e keni idenë se çfarë do të ndodhte në rast se do të autorizohej forca", tha kryeministri i vendit duke iu drejtuar deputetëve. Ndërkaq, disa nga deklaratat e tyre ai i quajti deklarata me motive elektorale dhe me mesazhe të tensionimit të situatës. Po ashtu, kryeministri i vendit kritikoi deputetët e opozitës për bojkotimin e mbledhjes së djeshme plenare të Kuvendit, gjatë debatit për gjendjen në veri të Kosovës.


Tutje, duke folur për aktin kriminal ndaj familjes së Selver Haradinajt, kryeministri Thaçi, tha se opinioni u bombardua me deklarata të ndryshme dhe me akuza të rënda ndaj një komuniteti të caktuar. "Për këtë do të flasin organet kompetente të hetuesisë dhe drejtësisë. Dhe, askush nuk ka të drejtë të akuzojë dikë, as në baza politike, as në ato etnike. Vrasja e Selver Haradinaj ka qenë akt kriminal dhe për zbardhjen e vrasjes është duke punuar edhe EULEX-i edhe KFOR-i", tha me këtë rast Thaçi, duke shtuar se dhuna ka qenë e papranueshme dhe e dënueshme nga të gjithë. Më tej ai foli edhe për kidnapimin e dy pjesëtarëve të Policisë së Kosovës në Merdare, duke theksuar se të dy policët kanë qenë me uniforma zyrtare dhe janë kidnapuar në territorin e Republikës së Kosovës.


Krejtësisht në fund ai ftoi gjithë spektrin politik që të punojnë bashkarisht dhe maksimalisht, gjë të cilën po e bënë Qeveria me faktorin ndërkombëtar, për të krijuar një situatë normale në veri. "Integriteti territorial i Republikës së Kosovës është i pacenueshëm, i njohur dhe i pranuar ndërkombëtarisht. Kosova është një dhe e pandarë", theksoi kryeministri i vendit.


Pas deklaratës së kryeministrit Thaçi kanë reaguar disa nga deputetët e partive opozitare, duke akuzuar Qeverinë e Kosovës për gjendjen e përkeqësuar në veriun e vendit, ndërkaq debati mes opozitës dhe kryeministrit vazhdoi me akuza dhe replika të ndryshme.


Në vijim të mbledhjes deputetët në lexim të parë shqyrtuan dhe përkrahën në parim Projektligjin për pasurimin e miellit, pas prezantimit të ministrit të Bujqësisë, Pylltarisë dhe Zhvillimit Rural, Blerand Stavileci dhe diskutimit të deputetëve. Ministri Stavileci në ekspozenë e tij për këtë projektligj përmendi pasojat nga mielli i pa pasuruar. Si rezultat i kësaj, ai tha se kjo ndikon në zhvillimin e fëmijëve, deri tek sëmundjet kardiovaskulare. Duke theksuar se kjo fushë deri më tani ka qenë e pambuluar ligjërisht, ai foli edhe për rëndësinë e ligjit. U tha se ligji është i rëndësishëm sa për ruajtjen e shëndetit të njeriut, ashtu edhe për fushën ekonomike, ndërsa me këtë projektligj theksoi Stavileci, garantohet siguria dhe cilësia.


Në vijim të mbledhjes deputetët për herë të dytë shqyrtuan Projektligjin për ndryshimin dhe plotësimin e Ligjit për administratën tatimore dhe procedurat, pas arsyetimit të raportit me rekomandime nga kryetarja e Komisionit për Buxhet dhe Financa, Safete Hadërgjonaj.


Deputetët, me shumicë votash miratuan Projektligjin për ndryshimin dhe plotësimin e Ligjit për administratën tatimore dhe procedurat, ndërsa në vijim shqyrtuan edhe raportin e parë për zbatimin e Planit të Veprimit të Kuvendit të Kosovës për Integrim Evropian, për vitin 2012.

Me këtë rast deputeti Lutfi Haziri, kryetar i Komisionit për Integrime Evropiane, duke paraqitur raportin, tha se kjo tregon qartë të arriturat gjatë tre muajve, ndërkaq, shtoi se gjatë kësaj kohe Kuvendi ka ndërmarrë veprime për zbatim të këtij plani, por natyrisht mbeten veprime të parealizuara. Haziri duke folur tutje për rëndësinë e këtij dokumenti tha se ky është dokumenti më i rëndësishëm i institucioneve të Kosovës, i cili tregon punën dhe përgjegjësinë e institucioneve të vendit, drejt shtyrjes së agjendës evropiane.


Ai më tej shtoi se Kuvendi i Republikës së Kosovës ka shënuar progres të lehtë, sa i përket zbatimit të Planit të Veprimit, ndërsa mes tjerash përmendi edhe reformat që janë bërë në organogramin e Kuvendit të Kosovës.


Megjithatë, Haziri tha se disa veprime mbeten sfidë për t'u realizuar duke përmendur disa nga progreset që nuk janë shënuar. Mes tjerash u përmend edhe gjendja në veriun e Kosovës, çështja e kufijve, krimi i organizuar, çështja e papunësisë, etj. Tutje, deputeti Haziri, duke folur për rolin e Kuvendit tha se ky institucion duhet të vazhdojë me kapacitete mbikëqyrëse, si dhe duhet të kërkohet nga Qeveria miratimi i një numri më të madh të ligjeve të cilat janë pjesë e agjendës evropiane. Ai po ashtu tha se në këtë raport janë paraqitur angazhimet dhe veprimet e ndërmarra nga institucionet përkatëse, qoftë nga trupat e Kuvendit apo institucionet tjera që janë në varësi të Kuvendit. Më tej Haziri tha se Kuvendi ka miratuar të gjitha ligjet të cilat kanë dalë nga lista e Komisionit Evropian. Duke përsëritur faktin se Kuvendi ka ndërmarrë veprime konkrete, ai theksoi se kërkesë mbetet përkushtimi më i madh i komisioneve parlamentare për monitorim të punës së Qeverisë dhe institucioneve tjera, duke shtuar se detyrat e mbetura nga komisionet duhet të realizohen, dhe duhet të jemi rigoroz, nëse duam që raporti i KE-së për këtë vit të jetë raport pozitiv, tha Haziri.


Pas një diskutimi të gjerë të deputetëve, me shumicë votash u mbështet raporti i parë për zbatimin e Planit të Veprimit të Kuvendit të Kosovës për Integrim Evropian, për vitin 2012.
Në vazhdim të mbledhjes deputetët shqyrtuan dhe përkrahën tri raporte: Raportin vjetor të Autoritetit të Konkurrencës të Kosovës, për vitin 2011, raportin vjetor të Organit Shqyrtues të Prokurimit, për vitin 2011, si dhe raportin vjetor të Komisionit Rregullativ të Prokurimit Publik, për vitin 2011. Ndërsa, mbështetjen e deputetëve nuk e mori Strategjia dhe Plani i veprimit kundër korrupsionit, për vitet 2012-2016.

Mbledhja plenare e Kuvendit Mbledhja plenare e Kuvendit Mbledhja plenare e Kuvendit Mbledhja plenare e Kuvendit
 

Komisioni për Buxhet dhe Financa

Tel: 038 211 186

Email: asd@sadfsdf.com

Komisioni për Buxhet dhe Financa

Tel: 038 211 186

Email: asd@sadfsdf.com