Organizuar nga Organizata për Bashkëpunim dhe Siguri Evropiane dhe Kuvendi i Kosovës, nga 10 deri më 11 qershor mbahet në Prishtinë tryeza e rrumbullakët e parlamenteve të Evropës Juglindore ( marrin pjesë deputetë nga Kosova, Maqedonia, Bosnja dhe Hercegovina, Serbia, Mali i Zi, Bullgaria, Rumania dhe Shqipëria), në temën Drejt zhvillimit të një mbikëqyrje efektive të qeverisë nga parlamenti
Fjalën e hapjes Werner dhe Daci
Tryeza fillon punën të premten, në Hotel Viktoria, në orën 9:00. Fjalën e hapjes do ta mbajë shefi i OSBE-së në Kosovë, Werner Wnendt dhe kryeparlamentari Daci, kurse në temën Fuqizimi i parlamenteve me zhvillimin e rrjetave regjionale do të paraqitet z. Adrian Severin, ish kryetar i Asamblesë Parlamentare të OSBE-së.
Takimi do të jetë i hapur për media deri në orën 10 kur fillon puna në panel.
Puna në panele dhe konkluzionet
Pjesëmarrësit do të punojnë në panele edhe pasditen e së premtes, ku do të paraqiten kumtesa të shumta dhe do të ketë diskutime për çështje të cilat lidhen me temën e tryezës. Në përfundim pritet të nxirren konkluzionet e tryezës dhe të shtrohen propozime për bashkëpunim në të ardhmen.
Vizitë Kuvendit të Kosovës
Të premten, në orën 17:00, pjesëmarrësit e tryezës do ta vizitojnë Kuvendin e Kosovës.
Takim me PSSP-në, Petersen
Në ditën e fundit të qëndrimit në Kosovë ( të shtunën), parlamentarët e vendeve të Evropës Juglindore do të takohen me Përfaqësuesin Special të Sekretarit të Përgjithshëm të OKB-së, Soren Jessen Petersen dhe do ta vizitojnë Lipjanin.
