Lajmet e fundit

Grupi Parlamentar i Deputetëve të Rinj vizitoi departamentin për rini, në Komunën e Gjilanit

E Enjte, 26.04.2012




Një delegacion i Grupit Parlamentar të Deputetëve të Rinj, i kryesuar nga kryetarja e grupit, deputetja, Ganimete Musliu, vizitoi departamentin për rini, në komunën e Gjilanit, ku u pritën nga zyrtari për rini, i komunës së Gjilanit, z.Bujar Haziri, si dhe pjesëtarë të organizatave rinore të kësaj komune.

Duke e përshëndetur delegacionin e grupit parlamentar të deputetëve të rinj , Haziri falënderoi ata për angazhimin e tyre, në veçanti për çështjet që kanë të bëjnë me të rinjtë dhe problemet me të cilat ballafaqohet rinia sot.

Kryetarja e grupit parlamentar të deputetëve të rinj, Ganimete Musliu, fillimisht njoftoi të pranishmit me punën e GP-së të deputetëve të rinj, si dhe me strukturën përbërëse të këtij grupi, ndërsa foli edhe për bashkëpunimin që ky grup ka me OJQ-të e ndryshme, me Parlamentin Studentor, si dhe me organizata studentore, të cilat veprojnë në kuadër të UP-së.

Me këtë rast Musliu përmendi një sërë problemesh të cilat janë evidente sot në shoqërinë tonë, duke u shprehur e gatshme që të merr përsipër çdo brengë të rinjve të kësaj komune, për ta adresuar në Kuvend.

Më tej, Musliu sqaroi se së shpejti ky grup parlamentar do ta bëjë edhe monitorimin e Ligjit për Fuqizim dhe Pjesëmarrje të Rinisë, duke kërkuar nga të rinjtë e kësaj komune për bashkëpunim me propozimet e tyre rreth këtij ligji. Ndërkaq, u shpreh e gatshme që të japë kontributin e saj në zgjidhjen e problemeve të ndryshme që e preokupojnë rininë tonë.
Me këtë rast foli edhe deputetja Valbona Dibra, e cila u shpreh e gatshme që të punojë drejt avancimit për të drejtat e të rinjve të Kosovës.

Grupi Parlamentar i Deputetëve të Rinj, të shoqëruar edhe nga Yll Buleshkaj, përfaqësues i OSBE-së, vizitoi edhe Bibliotekën e Gjilanit, me ç‘rast u pritën nga drejtori i bibliotekës, z. Shefki Osmani. Gjatë këtij takimi Osmani njoftoi deputetët me kushtet të cilat i ofron kjo biblioteke, si dhe foli për projektin e bibliotekës së re, e cila do të ndërtohet në qendër të Gjilanit.

Grupi Parlamentar i Deputetëve të Rinj vizitoi departamentin për rini, në Komunën e Gjilanit