Nën drejtimin e kryetarit Glauk Konjufca, Kuvendi i Republikës së Kosovës u mblodh sot në seancë të re plenare.
Pasi ngritën një varg çështjesh nga situata aktuale në vend, deputetët adresuan pyetje për anëtarët e kabinetit qeveritar.
Seanca vijoi me propozimin e mocionit nga kryetarja e GP të Vetëvendosjes, Mimoza Kusari Lila, për futjen në rend dite të vendimit të qeverisë për zgjatjen e masave emergjente në furnizim me energji.
Në emër të GP të PDK-së deputeti Ferat Shala kundërshtoi propozimin, ndërsa deputeti Driton Selmanaj paraqiti qëndrimin abstenues të GP të LDK-së.
Tutje Kuvendi futi në rend ditë edhe këtë pikë.
Në emër të ekzekutivit, vendimin e paraqiti dhe arsyetoi ministrja e Ekonomisë, Artane Rizvanolli, duke u hapur rrugë kështu paraqitjes së qëndrimeve nga grupet parlamentare.
Pas procesit të votimit, kryetari i Kuvendit bëri të ditur se me 58 deputetë që votuan, mungon kuourimi i mjaftueshëm për për vendimmarrje.
Duke hyrë në agjendën legjislative të punës, Kuvendi shqyrtoi për herë të parë Projektligjin për sanksionet e shёnjestruara kundër shkelësve të huaj të drejtave të njeriut, të cilin para deputetëve e prezantoi ministrja e Drejtësisë, Albulena Haxhiu.
Ministri i Kulturës, Rinisë dhe Sportit, Hajrullah Ceku, ndërkaq, prezantoi Projektligjin për Anti dopingun.
Pas diskutimeve, të dy këto projektligje u miratuan në shqyrtim të parë nga Kuvendi, duke i hapur rrugë shqyrtimit të tyre në komisione parlamentare.
Për Projektligjin për edukimin në fëmijërinë e hershme, ndërkaq, të cilin e prezantoi ministrja e Arsimit, Shkencës dhe Teknologjisë, Arbërie Nagavci, nuk pati kuorum për vendimmarrje.
Në këtë rrethana Kuvendi ndërpreu punimet, për t’i vazhduar të hënën.
